विराटनगर / नोबेल मेडिकल कलेज टिचिङ अस्पतालअन्तर्गत सञ्चालित नोबेल क्यान्सर अस्पतालले मोरङको ग्रामथान गाउँपालिका–६ स्थित श्री पब्लिक उच्च माध्यमिक विद्यालयमा अध्ययनरत विद्यार्थीहरूलाई लक्षित गरी क्यान्सरसम्बन्धी सचेतनामूलक कार्यक्रम सम्पन्न गरेको छ। कक्षा ८, ९ र १० मा अध्ययनरत विद्यार्थीहरूलाई क्यान्सर रोगबारे सही जानकारी प्रदान गर्दै स्वास्थ्यप्रति सचेत बनाउने उद्देश्यले कार्यक्रम आयोजना गरिएको अस्पतालले जनाएको छ।
कार्यक्रममा नोबेल क्यान्सर अस्पतालका मेडिकल अन्कोलोजिस्ट डा. सुमित सिंहले क्यान्सर रोगका कारण, प्रारम्भिक लक्षण, जोखिम कारक, रोकथामका उपाय तथा समयमै परीक्षण र उपचारको महत्त्वबारे जानकारीमूलक प्रस्तुति दिनुभयो। उहाँले क्यान्सर कुनै पनि व्यक्तिलाई हुन सक्ने जटिल रोग भए पनि समयमै पहिचान र उपचार गर्न सकेमा धेरै अवस्थामा पूर्ण रूपमा निको हुन सक्ने बताउनुभयो।
प्रस्तुतिका क्रममा डा. सिंहले विशेषगरी सुर्तीजन्य पदार्थको सेवन, मदिराको दुरुपयोग, असन्तुलित खानपान, शारीरिक निष्क्रियता तथा अन्य अस्वस्थ जीवनशैलीका कारण क्यान्सरको जोखिम बढ्ने उल्लेख गर्नुभयो। उहाँले विद्यार्थीहरूलाई यस्ता जोखिमपूर्ण व्यवहारबाट टाढा रहँदै नियमित व्यायाम, स्वस्थ आहार र सकारात्मक जीवनशैली अपनाउन आग्रह गर्नुभयो।
उहाँले क्यान्सरसम्बन्धी समाजमा विद्यमान विभिन्न भ्रम, डर तथा गलत धारणाका कारण धेरै बिरामी समयमै उपचारको पहुँचमा आउन नसक्ने अवस्था रहेको बताउनुभयो। त्यसैले क्यान्सरबारे वैज्ञानिक र तथ्यमा आधारित जानकारी समुदायसम्म पुर्याउन आवश्यक रहेको उहाँको भनाइ थियो। प्रारम्भिक अवस्थामै रोग पहिचान भएमा उपचारको सफलता दर उल्लेखनीय रूपमा बढ्ने तथा बिरामीको जीवनस्तर सुधार गर्न सकिने जानकारी पनि उहाँले दिनुभयो।
कार्यक्रममा डा. सिंहले नोबेल क्यान्सर अस्पतालमा उपलब्ध अत्याधुनिक उपचार सेवाबारे समेत जानकारी गराउनुभयो। उहाँका अनुसार अस्पतालमा सर्जिकल अन्कोलोजी, मेडिकल अन्कोलोजी तथा रेडिएसन अन्कोलोजीलगायत क्यान्सर उपचारका सम्पूर्ण आधुनिक सेवा एकै स्थानबाट प्रदान हुँदै आएका छन्। साथै, नेपालमै पहिलो पटक जडान गरिएको अत्याधुनिक Varian EDGE Radiation Therapy Machine सञ्चालनमा रहेको जानकारी दिँदै उहाँले विश्वस्तरीय क्यान्सर उपचार सेवा अब नेपालमै उपलब्ध भएकाले उपचारका लागि विदेश जानुपर्ने बाध्यता क्रमशः घट्दै गएको बताउनुभयो।
सचेतना कार्यक्रम अन्तरक्रियात्मकसमेत रहेको थियो। कार्यक्रममा सहभागी विद्यार्थीहरूले क्यान्सर रोगको पहिचान, उपचार प्रक्रिया, रोकथामका उपाय तथा जीवनशैलीसँग सम्बन्धित विभिन्न जिज्ञासा राखेका थिए। ती प्रश्नहरूको डा. सिंहले सरल, वैज्ञानिक र विद्यार्थीमैत्री ढंगले उत्तर दिनुभएको थियो।
कार्यक्रममा विद्यालयका शिक्षक, कर्मचारी तथा विद्यार्थीहरूको उल्लेखनीय सहभागिता रहेको थियो। सहभागीहरूले यस्ता कार्यक्रमले स्वास्थ्यसम्बन्धी ज्ञान वृद्धि गर्न तथा विद्यार्थीहरूलाई सचेत नागरिकका रूपमा विकास गर्न महत्वपूर्ण भूमिका खेल्ने धारणा व्यक्त गरेका थिए।
विद्यालय प्रशासनले पनि विद्यालयस्तरमै स्वास्थ्य शिक्षा र रोग रोकथामसम्बन्धी सचेतना कार्यक्रम सञ्चालन हुनु सकारात्मक पहल भएको उल्लेख गर्दै यस्ता कार्यक्रमले विद्यार्थीहरूमा स्वास्थ्य चेतना अभिवृद्धि गर्न र भविष्यमा स्वस्थ समाज निर्माणमा टेवा पुर्याउने विश्वास व्यक्त गरेको छ।
नोबेल क्यान्सर अस्पतालले क्यान्सर रोकथाम, प्रारम्भिक पहिचान तथा आधुनिक उपचार सेवाबारे जनचेतना अभिवृद्धि गर्ने उद्देश्यले विद्यालय, समुदाय तथा विभिन्न संघसंस्थासँग सहकार्य गर्दै यस्ता कार्यक्रमहरू नियमित रूपमा सञ्चालन गर्दै आएको जनाएको छ।
